Un annu dopu à una ghjustra in Martinica, a squadra corsa ritrova i terreni issa dumenica. Sta volta, sò duie partite, una avà è u ritornu l’annu chì vene in Purtivechji di fronte à a prima selezzione s
arda di a storia. L’occasione, dinò, di rinfurzà a leia trà e duie isule…
A fine di maghju o u principiu di ghjugnu, eccu l’appuntamentu ch’ella ci dà a squadra corsa per una partita à l’annu dapoi u 2009. Un filu ripigliatu dapoi parechji anni è mantenutu sin’à d’oghje. Cusì, fora d’un annu o dui, i « neri è bianchi » anu sempre ghjucatu contru à selezzione più o menu rinumate (Nigeria, Bulgaria…) Hè l’occasione, dapoi tuttu stu tempu, di rinfurzà a squadra, di creà una dinamica ma, dapoi qualchì tempu, di rivindicà dinò l’ufficialisazione di a squadra corsa. Imbusca maiò chì permetteria à a Corsica di participà à scontri qualificativi per u Campiunatu d’Auropa o a Cuppa di u Mondu. Cum’è d’altronde, d’altri regione di a Pianetta…
Aspettendu, a squadra corsa face a so strada è cuntinueghja, pian’, pianinu à avanzà. Si tratta, sta volta, di ghjucà di fronte à un’isula surella, a Sardegna. Una manera di sviluppà, à u nivellu spurtivu sta volta, relazione dighjà bè avanzate in d’altri duminii. Per sta prima partita, a selezzione serà privata da i ghjucadori di u GFCA chì ghjocanu, à listessa ora o guasgi, di fronte à Le Mans. Tandu, Campanini, Pierazzi, Guidi, Fogacci, Palmieri è Anziani ùn seranu di u spiazzamentu. Nè mancu l’aceisti Matteu Tramoni è Lucas Pellegrini, feriti. Senza dinò i Bastiacci Vincent è Lorenzi. Ghjuvan Micheli Cavalli puderà cuntà nantu à a prisenza di Rémy Cabella, di ritornu dopu à qualchì annu, l’Aceisti Tomi, Sollacaro, Cavalli, i Bastiacci (Bocognano, Coulibaly, Cioni, Santelli, Poggi), Penneteau babbu è figliolu, Marchetti, Pomponi o Cahuzac. Leca, benchè suspesu, hà tenutu à stà cù i so partenarii di Lens chì ghjocanu una piazza in Lega una in Dijon.
U macciu di fronte à a squadra sarda si ghjocherà in Olbia cù forse monda ghjente. Masimu ch’ellu hè u primu di a selezzione avversa. Cù dinò, una mediatisazione maiò intornu à una partita interessante. U ritornu hè privistu da quì à un annu…
