L’affare hà fattu u giru di e rete suciale in fine di settimana scorsa. Dopu à un votu, l’Assemblea di Corsica hà dumandatu di manera ufficiale à a FIFA, di fà entre a Corsica. Di permette, cusì, à a Squadra Corsa, di participà à scontri internaziunali è, perchè micca, ghjucà una cuppa di u mondu. A Federazione Internaziunale hà, per contu soiu, rispostu dumandendu l’avisu finale di a FFF. E per Noël Le Graët, u so presidente, l’affare saria, nanzu à tuttu, puliticu è per avà « manc’à pinsà la. Tandu, Squadra 
Corsa in a seconda manifestazione spurtiva di u mondu dopu à i Ghjochi Olimpichi? Ci vuleria aspettà una bella stonda…
Arrimbendusi nantu à un fattu storicu,quellu di l’esistenza d’una squadra Corsa di ballò dapoi cinquant’anni, l’Assemblea hà dumandatu, a settimana scorsa dopu à un votu, à a FIFA di fà a entre a Squadra Corsa. Un passu maiò chì permetteria à l’Isulani di participà à Cumpetizione Internaziunale. E sopratuttu di dà cù « FIFA Forwards » mezi à un sportu in periculu ind’è noinoi. Si sà, di più, chè issa Squadra hè u solu « rughjone », dapoi un mezu seculu, à avè battutu a Francia (ferraghju u 1967). Senza sminticà ne mancu tutti i ghjucadori ch’anu fattu l’onore di a Corsica : Marcialis (babbu è figliolu), Sansonetti, Papi, Orlanducci, Marchioni, Ettori, Alessandri, Olmeta, Cavalli, Cahuzac, Pierazzi, Cabella…
Ma per a FIFA, a risposta divia vene da a FFF, chè a Corsica hè piazzata sottu à a so respunsabilità. Quì, Noël Le Graët, u so presidente, hè statu chjaru : « Manc’à pinsà la…Ci saria una dimensione pulitica è tocca à Guvernu di piglià una decisione. Ci sò parechji rughjoni di Francia chì sò in a listessa situazione… »
U fattu hè, ci vole à ricunnoscelu, chè da a pulitica à u sportu, u passu hè abbastanza cortu. E, per disgrazia, a risposta, a cunniscemu dapoi anni è anni.
