Dopu à cinque ghjorni di cumpetizione ghjucati davanti à un publicu abbastanza numarosu, e finale, stu luni di a Penticosta, anu vistu, in seconda seria, a vittoria di Lilian Prod’homme per i masci (terza vittoria di fila) è Emilie Bacquet per e femine. Ghjè Bernardu Guidicelli, u presidente di a Federazione Naziunale chì hè ghjuntu à dà i premii…
U ghjocu di Tennis, cù portabandere cum’è De Bernardi o Lokoli, si porta bè in Corsica. Masimu quandu u presidente di a Federazione Francese hè u Corsu è cerca à dà un altru soffiu à sta disciplina, à u nivellu naziunale, di sicura, ma dinò regiunale. Cusì, Bernardu Guidicelli avia decisu d’esse prisente durante i cinque ghjorni di i campiunati di Corsica chì si sò tenuti in Calvi. Accantu à ellu, Gail Benedetti, chì vinse in Rolland Garros tempi fà.
Ci vole à ricunnosce chè, questu annu dinò, u nivellu hè statu abbastanza altu. In tuttu, 35 ghjucadori, masci è femine, sò stati premiati : prima di tutti, a Purtivechjaccia Emilie Bacquet chì batte à Alice Battesti (Mezzavia) in finale di e donne (6-2, 6-4).Per cunsulà si, l’Aiaccina, ghjucadore d’avvene, hà vintu a ghjustra di i tredeci-quatordeci anni. Per ciò chì tocca à l’omi, micca surpresa cù a terza vittoria di fila per Lilian Prod’homme chì vince, sta volta contru à Lisandru Rodriguez di a Costa Verde (6-0, 6-2), a rivincita di a finale di l’annu scorsu. Cù un serviziu debule, Rodriguez ùn hà pussutu tene di fronte à un avversariu chì, ellu, hà fattu pochi sbagli. Una bella prumuzione, in tutti i casi, per una disciplina chì, pian’ pianinu, cuntinueghja à fà a so strada…
