Ottanta trè spurtivi, tutti scritti nantu à e liste ministeriale è chì pudarianu esse à più o menu longu andà, purtati ver di i nivelli i più alti, ponu cuntinuà à travaglià è intrenà si. Una bona per tutti, atleti, educatori, dirigenti per ùn piantà micca l’attività è a prugressione di i ghjovani. Ma certi sò da cantu…
S’è a crisa sanitaria hè ghjunta à mette un frenu à l’a
ttività spurtiva di i ghjovani cù e cunsequenze ch’è noi li pudemu cunnosce, u Guvernu francese, per via di a Ministra di i Sport, avia datu u so accunsentu per ciò chì tocca à u prufessiunalisimu o e strutture dedicate à l’altu nivellu. Tandu, i quattru « Pôles Espoir » di Corsica (Judo, handball, karaté, football) stanu aperti è ponu cuntinuà à travaglià d’una manera regulare à a prugressione di i so ghjovani. Senza cumpetizione quantunque. Una bona quandu si sà, d’altronde, chè a rumpitura di marzu scorsu hà fattu male à tutte e strutture. Fora di quelle, ottanta trè ghjovani atleti sò, ind’è noi, scritti nantu à e liste ministeriale dedicate à l’altu nivellu. Cusì, tutti anu u listessu « privilegiu ». Quellu di pudè andà à a scola a matina è intrenà si u dopu meziornu. Tutti sì, ma daretu, sò numarosi à esse elli dinò, dedicati à una carriera. salvu ch’ùn sò micca scritti nantu à liste ministeriale. Tandu, ùn anu micca a pussibilità, cum’è l’atri, d’intrenà si ch’elli sò à l’arrestu. Un colpu abbastanza duru quandu si sà chè i Centri Regiunali permettenu di travaglià quant’è i « Pôles Espoir ». Saria solu un affare di denumiazione chè tutti l’atleti sò dédicati à l’altu nivellu. Speremu, quantunque, una suluzione più logica da quì à pocu…
