Maestru d’u capu à a fine di a partita, u GFCA hà pigliatu a suprana nantu à Tulusa, quartu di a classifica, stu marti à u Palatinu. U macciu di fronte à Rennes, stu sabbatu hè monda aspettatu
Ci sò macci chì rinforzanu un gruppu. È s’è, sin’à d’avà, u Gaz era statu mezu caldu è mezu fretu, iss’appuntamentu quì di fronte à i Spacer’s di Tulusa ci hà ramintatu, in qualchì mumentu, i Diavuli rossi di a stagione scorsa. È s’ellu hè capace di mantene stu nivellu, u Gazelec puderà fà male…
A prima parte dà u ritimu di ciò ch’ellu serà u macciu sin’à a fine. Una squadra aiacina chì piglia subbitu a suprana cù a qualità di serviziu dighjà interessante. È cum’è à u muru è in recezzione i rossi è turchinu lascianu pisticcine à i so avversarii, l’affare hè compia in una mezoretta (25-18).
Di capu ind’a conca, Tulusa prova à reagisce. Tandu, a parità hà da durà sin’ à a metà di a seconda parte (11-11). È ghjè l’anzianu aiaccinu Takaniko chì permette à i so culori di passà davanti è di mette a pressione (11-14, 13-17). U Gazelec ùn pare micca truvà soluzione. Masimu chè i Spacers’ ritrovanu appena di grinta in i scambii, à u serviziu è à u muru. Eppuru l’Aiaccini anu da alzà u so nivellu cù un Ben Taara decisivu (trè punti di fila). Cù à a seguita, dui contri di Radic è un puntu di Trhutchev, u GFCA retablisce a parità (19-19, 20-20). Ripiglia a suprana à u muru è ùn lascià più nulla à so avversariu. Quellu mette un primu ghjinochju in terra dopu à un puntu di Bruckert (22-21). Ben Taara aghjusta a soia è u Gaz piglia duie parte d’avanza à a pausa (25-22).
Ferma, avà, à finisce u travagliu. In a terza parte, Tulusa dà l’illusione di vultà (3-5, 4-6). Ma stu GFCA vole compie l’affare. Ind’un macciu induve ùn hà persu a so voglia, aghjusta punti chì facenu male (18-14) è, pian’pianinu, si ne vanu à vince una partita di manera logica (25-18). U populu rossu è turchinu aspetta avà, à Rennes, sabbatu sempre à u Palatinu. Un altru affare ma…impussibule ùn hè micca GFCA !
Sala di u Palatinu
GFCA-Toulouse
Spettatori : 660 à pocu pressu
Arbitri : M. Gilbert et Mma Hayaux du Tillie
Evoluzioni di a marca : 25-18 (30’), 25-22 (23’), 25-18 (24’)
GFCA : 8 servizi diretti, 45 punti d’attacca, 6 contri, 18 sbagli cù 10 à u serviziu
Sei primi : Radic (cap.) (5), Truhtchev (15), Ben Taara (17), Bruckert (10), Milivojevic (2) (Jaumel, 5, Roatta 1, Lomba 4)- libero : Kroiss-ent : F. Ferrandez
Toulouse Spacer’s : 1 servizi diretti, 32 punti d’attacca, 7 contri, 17 sbagli cù 9 à u serviziu
Sei primi : Takaniko (cap.) (0) (5), Burel (7), Jorna (5), Debrouillon (16), Faure (0), Baxpohler (0) (Madsen 8, Demyanenko 4)- libero : Closter- ent : S. Sapinart
