U GFCA face piegà u campione di Francia (3-1)

Dopu à un maccione, l’omi di Fred Ferrandez anu datu a lezziò à Tours è tutte e so « stelle » issu marti à u Palatinu (3-1). Una vittoria ch’insolca, forse, a stagione di i rossi è turchini. Un gruppu novu cù qualità chì li pudarianu permette, s’è tuttu và bè, di francà un passu…

Ci sò partite chì vi danu, dighjà, un certu sintimu di ciò chì pudaria esse una stagione. Issu GFCA-Tours ne face parte. Ancu s’è a stagione vene ghjustu di principià, pudemu avè qualchì insignamentu. È issu macciu, ci n’hà datu tanti stu marti à u Palatinu.

I primi scambii di a partita anu datu dighjà, infurmazione. Una squadra aiaccina assai prisente in tutti i settori di u ghjocu : servizii putenti, contri, una difesa di quelle, un muru sempre bè piazzatu, è uffensive bè appruntate cù a leia trà Pujol (à a passa) è Pepic (u compiipunti) dighjà in piazza. U TVB hà messu un ghjinochju in terra. Ancu s’è e so qualità è a so sperienza l’anu permessu di stà sempre in a partita. Ma una prima parte, di manera logica, in e stacche rosse è turchine (25-23).

A seconda parte ùn scambierà micca u scenariu. Bruckert, Carle, Douglas, e cacciate di Jeff Exiga, i punti di Pepic, Tours ferà torna una volta ghjucà a so sperienza per pruvà à mantene si in u macciu. Ma a qualità di u ghjocu aiaccinu face a diferenza. Resultatu : 25-22 in una mezoretta è 2-0 nanzu à a pausa.

A squadra di Patrick Duflos reagisce subbitu dopu à a ripresa è piglia a suprana nantu à una squadra aiaccina appena corta fisicamente. Basterà per permette à u campione di Francia di piglià si a terza parte di manera logica (17-25) in 24 minute…

Tandu si pudia avè a paura, dopu à tamantu macciu,di ghjucà a parte decisiva. Masimu chè u Gazelec avia supranatu u so avversariu a maiò parte di u tempu…Ma nimu ùn cunnosce ancu a forza mentale (assai impurtante in questa disciplina) di stu GFCA ! Entre pian, pianinu in sta quarta parte. Nanzu di ritruvà u so ghjocu di i dui primi tempi. Tandu, Tours ùn puderà esiste. Davanti à u so publicu, u GFCA finisce a partita cum’è l’avia principiata. Resultatu : 25-17, una bella vittoria è trè punti in a stacca. Un successu ch’insolca forse a stagione. Un macciu da cunfermà issu sabbatu in Rennes…