Sò cinquanta sei anni chè a squadra nera è bianca di u presidente De Nobili face a so strada. Più d’un mezu seculu di passione per una disciplina insulcata in a cità imperiale. Di tantu in tantu, un bellu colpu ma, sopratuttu u scopu di tramandà valori chì si ponu sparghje aldilà di u sportu. Cusì, u HAC (referenza à a squadra di ballò a più vechja di Francia… Ma micca a più populare in Aiacciu) hà passatu l’anni. È ottenutu, a stagione scorsa, un bellu rigalu : una piazza-cunquista nantu à i terreni- in Naziunale 2 per e femine. À u so capu, un addestradore novu, Stefanu Petreto -avia e 18 anni naziunale- chì piglia a seguita di Florian Sauvage
t. Ci dà u so parè nantu à u gruppu è, à tempu, l’ambizione di a so squadra…
-Chì pensate di u principiu di u campiunatu ?
Avemu una bella squadra. L’aviu vista ghjucà a staghjone scorsa. Ci era da chì fà ma, pensu chè e femine, ùn pigliavanu micca cuscenza di e so capacità. Si ghjucava piuttostu nantu à e qualità individuale. Ciò chì era dighjà bè. Ma, per tene a strada à un nivellu più altu, ci vulia d’altre esisgenze. Ghjè un pocu ciò ch’avemu travagliatu dapoi a ripresa è nanzu di principià u campiunatu. E femine anu capitu iss’esisgenze è facenu i sforzi necessarii. Ùn sò micca surpresu di i resultati.
U gruppu ?
Hè un gruppu monda interessante chì travaglia bè. Avemu tenutu a maiò parte di e femine di l’annu scorsu, ciò chì hè una bona per a cuerenza. Eppo, avemu aghjustatu trè femine chì t’anu una certa sperienza d’issu nivellu è chì portanu da veru, qualcosa in più. Per prova, i resultati ch’è noi t’avemu dapoi u principiu di u campiunatu.
-Chì sò i scopi issa staghjone ?
Pensu ch’avemu a capacità di cullà in Naziunale una. Cù u scambiamentu di e regule interne, avemu avutu a pussibilità di passà, da a N3 à a N2. Pudemu, oghje, francà un altru passu. S’ùn ci hè micca troppu ferite, sopratuttu a nostra purtiera ch’ùn hà micca rimpiazzante, pudaremu mantene issu ritimu. Ci vole à esse ambiziosu.
