Campione di Divisione d’Onore a stagione scorsa, a squadra di u presidente Pellegrini scupria, d’aostu, una cumpetizione dighjà cunnisciuta dece anni fà. Dopu à un principiu favurevule è u cuntinuti interessante, u gruppu scontra qualchì difficultà. Ma stà quantunque capace d’assicurà u so mantenimentu…
À a fine di l’eserciziu 2008-2009, u FC Bastelicaccia, vultava da u CFA2 à a divisione d’Onore per…un puntu. Dapoi, n’hè passata acqua sottu à i ponti. U tempu, per i « Rossi » di travaglià una decina d’anni è di cunnosce una stagione 2007-2008 magnifica ! Una sola scunfitta è un bigliettu per cunnosce dinò a Naziunale 3 (nome datu à CFA2). D’aostu scorsu, cù dirigenti novi, un travaglione à u nivellu di e strutture, l’addestradore di l’accessione (Ghjuvan Lucca Luciani), a maiò parte di i ghjucadori di l’annu passatu è uni pochi d’altri capaci di purtà qualcosa in più, a squadra hà apertu un’altra pagina di a so storia. L’iniziu fù abbastanza bè per un gruppu ch’avia scambiatu di nivellu. Una parità in casa soia di fronte à Aubagne (1-1), un’ altra nantu à u terrenu di l’EFB (0-0) è una prima vittoria di fronte à l’ES Cannet (3-2), permettia à u gruppu di stallà si à a cinquesima piazza di a classifica. Nanzu di rende visita à Saint-Remy. A seguita hè stata più debule. Una sola parità (2-2 di fronte à u Gallia cù un’azzione assai dubbitosa à l’ultima seconda di a partita quandu i Bastiacci anu marcatu a seconda volta) è trè scunfitte (3-2 in Saint-Rémy, 1-0 in Gémenos è 1-2 di fronte à Villefranche). Di fattu, i ghjucadori di Ghjuvan Lucca Luciani sò capaci di sviluppà un ghjocu abbastanza interessante, masimu à u nivellu offensivu, ma t’anu difficultà à tene un resultatu (vincianu 2-1 in Saint-Rémy à menu di dece minute di a fine, 2-1 davanti à u Gallia sin’à l’ultima azzione). Sò punti chì l’avarianu permessu di stà in a prima parte di a classifica. Mentre chè in issa situazione quì, ci saria quantunque una pressione in più. Masimu chè a prussima partita, dopu à a cuppa di Francia (induve sò stati cacciati) serà u trè di nuvembre in Mezavia di fronte à…u Sporting di Bastia. Cù u ritornu di qualchì feritu (forse Matteu Scarpelli in mezuterrenu), è a sperienza necessaria chì s’hà da sulcà à pocu à pocu, si pò, quantunque sperà chè issa squadra serà capace di ripiglià u so filu…
