U primu d’aprile prussimu, à l’occasione di a trentesima ghjurnata di Lega Duie è di fronte à Auxerre, à u capu di a classifica, u stadiu François Coty purterà u nome di Micheli Moretti, legenda di u club è à l’iniziu di a so famosa ascensione da u mondu amatore à u prufessiunalisimu. Una prumessa di i dirigenti di l’epica, dopu à a sparizione di u presidente « Biancu è Rossu », u 31 di marzu di u 2008.
À l’occasione di u macciu ACA-Nantes, l’ondeci di marzu di u 2008, prima partita in Timizolu dopu à a sparizione di Micheli Moretti, presidente di l’ACA, Alanu Orsoni, ch’avia pigliatu a direzzione di u club, avia fattu a prumessa sulenna di dà u nome di u presidente aiaccinu à u stadiu François Coty, creatu in u 1962 è apertu di manera ufficiale in u 1968. Ci hè dunque vulsutu à aspettà sedeci anni per tene issa prumessa. U tempu di fà travagli di renuvazione in u stadiu, di pudè avè l’accunsentu di a legge (u stadiu era statu ricunnisciutu d’interessu publicu) è d’avè, à tempu un partenariatu publicu-privatu. L’inseme hè statu longu à mette in piazza trà prublemi cù a Prifettura, travagli è prublemi suldarini. In fine, l’ultima fasa hè stata compia à l’occasione di l’accessione di l’ACA in Lega una (2022-2023). Hè logicu, tandu, di vede i dirigenti aiaccini tene a so prumessa. Un primu d’aprile à vene, quandu si ghjucherà a partita di fronte à Auxerre, à u capu di a Lega duie, u stadiu François Coty serà battizatu stadiu Micheli Moretti in umaggiu à quellu fù una vera legenda. Per quelli ch’ùn la sanu micca, Micheli Moretti, chì ripigliò, un club in pezzi in PHB in u 1992, s’era datu deci anni per vultà in prima divisione. Cù isse parole: « D’Antisanti au Parc des Princes », « Da l’infernu à u Paradisu ». Presidente, addestratori, ghjucadori, dirigenti, tutti anu pussutu riesce issa scumessa. Ma, à dilla franca, quantu eranu à crede l’ACA capace di francà tanti passi da u mondu amatore à a Lega Una. Eppuru, Micheli a fece. È à tempu à issa scumessa spurtiva, ci n’era d’altre: i travagli di u stadiu è sopratutti a creazione d’un centru di furmazione. Oghje, issu dui cartulari sò in piazza. È l’ACA hà principiatu, di settembre scorsu, a so vintisettesima stagione di fila in u mondu prufessiunale, vistu passà tanti ghjucadori rinumati (Loko, Diomède, Ochoa, Mutu…), furmatu ghjucadori di talente (Pierazzi, André, Delort, i fratelli Tramoni…). U primu d’aprile, speremu chè Timizolu serà carcu per vede u stadiu purtà u nome di Micheli Moretti, figura di l’ACA, omu di stintu, ricunnisciutu da tutti in Corsica è ancu à u nivellu naziunale. Vulteremu da quì à pocu nantu à e ceremonie d’issu mumentu particulare.
