U club corsu hà messu in piazza a prucedura di liquidazione ghjudiziaria, depositendu, stu luni, u bilanciu di a sucetà chì gestia u settore prufessiunale. Sperà quantunque di riparte in Naziunale 3 piuttostu chè in Regiunale 1. Hè a fine d’un longu feuilleton. Cumu previstu, l’AC Aiacciu hà lasciatu u bilanciu stu luni 18 d’aostu davanti à u tribunale di cummerciu di a cità.
Duranti mesi, i so dirigenti – chì si ne anderanu in dimissione – anu circatu invanu un ripigliadore per cumpiè un deficit d’ùn menu di 13 milioni d’euri. Un bucu chì, secondu à Corse-Matin, puderia esse ancu più impurtante. Ùn avendu trovu stu benfatore, l’ACA hà sceltu a cessazione di i pagamenti è a so liquidazione. U club perde cusì u so statutu prufessiunale.
Stu depositu di bilanciu cunsacra dinù u licenziamentu di i 180 impiigati di u club è a chjusura di u centru di furmazione, chì era statu designatu in maghju scorsu trà i migliori di a Liga 2. L’ACA avia finitu 12esimu di stu campiunatu in primavera nanzu d’esse retrocessu amministrativamente in Naziunale è, u 13 d’aostu, esclusu da tutte e cumpetizione naziunale.
A nova assuciò chì averà d’ora in poi a gestione di u club spera d’evità sta punizione di più. U so scopu hè di ghjucà in Naziunale 3 – u 5u scaglione naziunale – piuttostu chè in Regiunale 1, u scaglione chì li hè attribuitu per avà. Per què, u club deve racoglie parechje centinaie di millaie d’euri nanzu di fà appellu di sta decisione stu ghjovi 21 d’aostu.
U « Culletivu biancu è rossu » – u gruppu di i Socios di u club aiaccinu – hà lanciatu per què una culletta chì, in 24 ore, hà racoltu 12 000 euri.
