Julia Tolofua è Astrid Gneto campione di Francia !

E duie atlete isulane anu ottenutu u titilu di campione di Francia in Amiens u trè di nuvembre scorsu. Li permette di marcà punti in u quadru di a qualificazione à i ghjochi ulimpichi di Tocchiò d’aostu prussimu.

À qualchì mese di i ghjochi ulimpichi, ogni medaglia pigliata quì è cullandi ch’ella sia à u nivellu naziunale o internaziunale permette di marcà punti è di piazzà si in a « ranking list » (lista internaziunale di tutti l’atleti). Masimu chè ci serà solu un atletu maschile è una feminile per ogni categuria. In Corsica, Julia Tolofua (più di settanta ottu chilò) è Astrid Gneto (menu di i cinquanta dui chilò)  si sò fatte valè à l’occasione di i campiunati di Francia chì si sò ghjucati in Amiens u trè di nuvembre scorsu.

Di fattu, ognunu in a so categuria, si n’hè vultatu cù a medaglia d’oru è u titulu di campione di Francia. Senza Anne M’Bairo, avversariu maiò per Tocchiò, Julia Tolofua hà pocu suffertu per vince a ghjustra. Dopu à Tbilissì induve era stata vittoriosa è Brasialia (terza piazza) a Calvese riesce una perfurmanza chì li permette di marcà punti è di mantene a so prima piazza à a « ranking-list ». Ci hà da vulè à cunfermà tutte e so qualità à l’occasione di l’ultime ligna dritta sin’à d’aostu. Ma t’hà, di sicuru, e capacità per fà parte di a selezzione.

Per Astrid, a più chjuca di e surelle Gneto, l’affare s’avvicina. Senza Amandine Buchard, capifila di a « ranking-list », l’affare paria più faciule è a zitella di Purtivechju hà assicuratu u so statutu. Dilusa d’ùn avè micca ottenuta a selezzione per i campiunati di u mondu, stu titulu li permette di marcà punti è, aldilà di piglià cunfidenza. Astrid hè, oghje, seconda di a lista daretu à a so rivale. Li tocca à fà sforzi per vince u so bigliettu per Tocchiò. Per ciò chì tocca à Priscilla (medaglia di bronzu dopu esse stata richjappata à u primu giru), serà più difficiule (quarta piazza à u generale). Ma perchè micca ritruvà e trè anziane zitelle di u centru di furmazione di u CSJC in Tocchiò d’aostu prussimu ?