A 23a edizione di i Ghjochi di l’Isule s’hè principiata cù cinque discipline: ghjocu à ballò, tennis, volley, handball è vela. Nanzu a ceremonia d’apertura, in fine di dopu meziornu nantu à a piazza San Niculau di Bastia, sottu à u famosu innu à a gioa di Ludwig Van Beethoven…
A cumpetizione di i ghjochi di l’Isule, monda aspettata questu annu perchè si ghjoca ind’è noi, tene tutte e so prumesse. Hè stata principiata eri cù cinque discipline: u ballò cù a parità di a squadra scorsa di fronte à l’Azzori (0-0) è a vittoria di Maiorca contru à l’Elbe (3-0). Sempre à l’onore, a squadra corsa, sta volta in Tennis hà mustratu tutte e so qualità, masimu di fronte à squadre maiò cum’è Maiorca (induve hà principiatu un certu Nadal). Sempre per ciò chì tocca à e discipline cullettive, hè statu più difficiule per e squadre di Volley è di Handball chì mancanu, forse, di sperienza ma ch’anu da cresce à pocu à pocu cù cumpetizione cusì. In fine, in vela, a Corsica face a so Strada ma l’affare parse abbastanza stretta cù l’Azzore, Malta è Sicilia. Versu cinque ore dopu meziornu, tutte e delegazione si sò ritruvate piazza San Niculau per a ceremonia d’apertura sottu à a musica di Ludwig Van Beethoven. A cumpetizione s’hè cuntinuata eri cù u ghjocu à ballò, tennis, rugby, ping pong, volley, scherma, nutera. Cusì, guasgi tutte e discipline priviste averanu participatu. Mancanu judo, karaté è basket stu vennari per esse cumplettu. Masimu chè tutte e finale sò priviste stu vennari…
