À cinquanta anni, issu atletu anzianu medagliatu ulimpicu in canuttaghju hà battutu à u principiu di u mese, quattru prove suprane naziunale in a corti di a SNA in Aiacciu. Stu ghjovi matina, s’attaccava à a prova suprana di u mezu maratonu…
Ùn si contanu più e sfide di Frédéric Kowal, anzianu famosu atletu rinumatu à u nivellu naziunale (ottu volte campione di Francia) è internaziunale (duie participazione à i ghjochi ulimpichi in Atlanta cù a medaglia di bronzu è Sydney). È s’ellu hà arrestatu a so carriera dopu à dodeci anni, ùn hà, à dilla franca, mai piantatu l’attività spurtiva. Ghjuntu in Corsica in u 1993 (dopu à i ghjochi di Barcelona), hà sempre vulsutu campà quì. Una scumessa tenuta sette anni fà cù a so famiglia. Stallatu nantu à a cumuna d’Alata, hà ripigliatu l’intrenamentu è à l’occasione di u so cinquantesimu anniversariu, hà vulsutu fà cascà quattru prove suprane naziunale: un ora, trenta minute, sei mila metri è deci mila metri…Quattru prove battute: una minuta è vinti per a prima, vintitrè siconde per l’altra, trentadui siconde per a terza è una minuta è sei per l’ultima. Subbitu dopu, l’atletu avia prumessu d’ùn piantà si quì. Stu ghjovi matina, à dece ore, s’hè attaccatu à a prova suprana di u mezu maratonu tenuta dapoi dodeci anni da Patrick Martin (1, 18′, 15 », 9 »’). Frédéric Kowal face u percorsu in 1,15′, 04 » 20. battendu a so sfida (1, 15, 14.09) di più di dece minute!!!