Capimachja di a classifica in Lega B dopu à ottu partite ghjucate, cù un percorsu di campione, u Gazelec vince i macci unu apressu à l’atru. L’occasione, per Fred Ferrandez, l’addestratore aiaccinu di fà u puntu nanzu di parte à ghjucà in Royan…
-U GFCA capimachja di Lega B senza scunfitta. Chì hè u vostru parè nantu à u principiu di stagione di a vostra squadra?
Vuliamu fà megliu chè l’annu scorsu è esse in i dui primi. À dilla franca, pinsavamu di corre apressu à Cannes, chì per mè era u candidatu u più seriu. Semu noi in testa, hè una piccula surpresa per tuttu u mondu, micca per noi.
-Comu spiegate issi resultati?
U gruppu travaglia abbastanza bè. Avemu à posti impurtanti cum’è quellu di compiapunti o a passa, i ghjucadori chì ci mancavanu l’annu scorsu. Ma, sapete, ùn avemu ghjucatu chè ottu partite. Ne ferma torna un pacchettu à ghjucà, ùn ci vole micca à pensà subbitu, ch’avemu da cullà. U scopu hè di cuntinuà u nostru percorsu senza metteci pressione.
-U macciu in Cannes a settimana chì vene serà decisivu à contu vostru?
Innò! Cum’è l’aghju detta nanzu, fermanu troppu macci, ùn semu ancu à a fine di a prima fasa. Ci vole à cuntinuà à ghjucà cum’è l’avemu fattu sin’à d’avà. Vince, fà participà tuttu u mondu, chè certi pudessinu acquistà una certa sperienza chì ci hà da pudè serve in u ciculu ritornu è masimu durante i play-off.
-U scopu hè di compie a stagione regulare à a prima piazza?
Seria una bona! Ma hà da esse duru chì ci avemu da spiazzà ind’è a maiò parte di i nostru avversarii diretti. Circheremu à fà per u megliu. Sapendu quantunque chè u primu riceverà 3 volte nantu à 5 in quarti di finale, 2 nantu à 3 in mezu finale è à u ritornu in finale cù u golden set. L’annu scorsu, avemu persu in quartu di finale, avemu mancatu, da pocu, u bigliettu per a meza finale è què senza esse primi di a stagione regulare. Dunque, videremu bè. Ci tocca à mantene issu ritimu è cuntinuà à travaglià. Qualcosa hà da sbuccà, ne sò cunvitu.
