Fred Ferrandez: “U gruppu t’hà a capacità à ghjucà i Play-Off”

0

 

Novesimu di a classifica (ondeci punti)  à quattru macci di u mezu percorsu, u GFCA, chì hà apertu, d’ottobre scorsu, una pagina nova, ci dà l’impressione di pudè fà assai megliu. Mancu di sperienza, di precisione, u maccione di fronte à Rennes, sabbatu scorsu carraterizeghja, à ellu solu, u percorsu di i rossi è turchini. Una squadra, capace di suffià u caldu è u fretu. Fred Ferrandez ci dà u so avisu nantu à stu principiu di stagione.

-U GFCA hè novesimu di a classifica. Chì hè u vostru parè nantu à u principiu di a stagione ?

Sò cuntentu di ciò ch’elli sò capaci à mustrà i ghjucadori dapoi u primu macciu. U cuntenutu hè interessante è u spiritu, a voglia, sempre quì. Malgratu què, u mancu  di sperienza ci costa monda, ch’avemu persu punti ch’è noi t’aviamu in manu è chì permetterianu di ghjucà cù menu pressione.

Aviate pigliatu u mantenimentu cum’è scopu, à u principiu di a stagione. Pensate megliu oghje ?

U gruppu t’hà a capacità à ghjucà i Play-Off. Ci hà da vulè à ghjucà più seriu è pensu à pudè finisce i macci quand’è noi t’avemu l’occasione.  S’è noi pigliemu sei o sette punti in quattru macci chì fermanu nanzu à a treva, pudemu sperà esse in a corsa à i Play-Off. E partite da vene seranu, in stu puntu quì decisive.

-U macciu di fronte à Rennes saria una lezziò da ritene ?

Hè sicuru ch’è noi t’avemu persu omancu un puntu sabbatu scorsu. U gruppu hè capace di tene a strada in stu campiunatu. Manca di sperienza è, ùn si sà perchè, perde u filu quand’ellu t’h u so destinu in manu. Hè nantu à stu puntu quì chè ci tocca à travaglià. Per ghjucà più libari.

Sparte

Dipusità unu cummentariu