U TP52 pilutatu da Laurent Camprubi, hà vintu, ghjovi scorsu u vinticinquesimu giru di Corsica à vele. Una perfumanza maiò per una regatta di duicentucinquanta migli in giru à l’isula…
Un battellu à vele tamantu capace di sfidà i venti, una squadra di quindeci membri, un capitanu rinumatu ( di a squadra CNTL di Marseglia), un tempu adattatu à issa corsa è una cunniscenza maiò di u mare, eccu l’elementi ch’anu permessu à « Alizée » è u so capimarinaru Laurent Camprubi, di vince u vinticinquesimu giru di Corsica, ghjovi scorsu. U battellu à vele hè ghjuntu u primu davanti e teppale di Bunifaziu, versu ondeci ore di sera. U tuttu dopu à trentacinque ore di corse per listessu numaru di battelli. Di fattu, Laurent Campubri è a so squadra, anu supranatu a cumpetizione da u principiu sin’à a fine. Cù cundizione assai favurevule (tempu assulanatu, ventu di punente) è malgratu uni pochi di prublemi (perdita d’una vela). Dopu à una reparazione fatta à a lestra vicinu à u Capicorsu, « Alizée », sempre davanti à l’altri participanti hà impostu u so ritimu. Cù pocu è micca sbagli, un ritimu difficiule da seguità per l’altri battelli è una gestione di dui mumenti senza ventu (vicinu à e cale di Calvi è Aghjacciu), Alizée hè ghjuntu u primu in Bunifaziu. Da chì fà nasce un’altra mutivazione à u so capitanu, prontu per d’altre sfide…