Alain Mercuri presidente di a Lega Corsa

0

Dopu à a partanza u quattru di ghjugnu scorsu, di Michèle Melgrani, presidente di a Lega Corse, ghjè Alain Mercuri, sin’à d’avà raghjuneru, chì ripiglia a seguita…

Cù dui milla atleti spertuti in nove strutture, a nutera averà, in Corsica, da chì fà. U travagliu ùn manca. Per gestisce a disciplina à u nivellu di l’isula, Alain Mercuri, anzianu raghjuneru, hè statu elettu à u capu di a Lega Corsa, dopu à a partanza di Michèle Melgrani, à u principiu di ghjugnu. Un’elezzione à l’unanimità chì dà di più credibilità à u so novu presidente. Anzianu respunsevule di e “Naïades d’Aiacciu” induve ci era a so zitella, vice presidente di u GFCA nutera è raghjuneru di a Lega, Alain Mercuri t’hà, hè vera a sperienza necessaria per tene a strada è purtà prughjetti. “Hè una prima elezzione per solu qualchì mese, spiega u presidente, l’elezzione per i quattru anni da vene si feranu di nuvembre.” Frà i scopi à cortu andà, l’apertura di e piscine, una necessità per rilancià una disciplina chì hà monda suffertu cù a crisa sanitaria…“Aspettemu a decisione à u  nivellu naziunale ma per avà serà quantunque difficiule. E misure sanitarie ci custreghjenu à mette un protocollu in piazza è ùn lu pudemu assicurà (distanza trà i zitelli difficiule à impone à i zitelli). Dopu, ci vole à piglià in contu ch’ellu ci vole à viutà è riempie una piscina chjosa un mese. Comu fariamu dopu à quattru mesi? Fora di què, averemu dinò prublemi finanziarii. S’è e piscine ùn aprenu micca, avemu da perde zitelli. Serà, à cortu andà, l’imbusca maiò per noi.”

Pierre Mondoloni, respunsevule di e cumpetitzione travaglia, avà, nantu à u calendariu 2020-2021 chì devaria esce di lugliu. Aspettendu, à pocu à pocu, una ripresa nurmale di l’attività…

 

 

Sparte

Dipusità unu cummentariu