A diciottesima edizione di u Cross di Pietrosella chì s’hè tenutu issa dumenica nantu à a cumuna hè stata una riesciuta maiò. Sessanta omi, vintidui donne è tanti zitelli di tutte e catugurie cù un inseme di trè centu vinti atleti anu fattu onore à a disciplina.
Monda aspettata da i specialisti, a diciottesima edizione di u Cross di Pietrosella, hà adunitu più di trè centu participanti eri tutta a ghjurnata nantu à i chjassi di a cumuna. In a matinata, sò i più chjuchi chì anu principiatu cù u sustegnu di e so famiglie. In dopu meziornu, e donne è l’omi anu pigliatu a seguita. Ottanta quattru atleti in tuttu (vinti duie donne è sessanta dui omi) per un percorsu diversu: cinque chilometri per e donne è ottu chilometri è quattru centu metri per l’omi, à mezu à chjassi di Pietrosella cù un dislivellu di quattru centu metri. Dopu à un maccione cù Sébastien Pinschina (CA Prupià), Xavier Paoli (A Suareddesa), secondu durante i dui primi giri, hà pigliatu u capu di a corsa di l’omi à l’ultimi per vince cù solu cinque seconde d’avanza (00.29’31 » contru à 00.29’36 »). Pierre-Olivier Bruschi (GFCA Atléthisme) piglia a terza piazza (00.30’27 »). Ind’è e donne, vittoria stretta di Maelys Devos (CAB), cù un tempu di 00.20’36 » davanti à Victoire Alzon (CAB, 00.20’40 ») è Amandine Vinchon (CO Purtichju, 00.21’52 »). « Fù una bella riesciuta, spiega Félix Antonietti, capimachja di l’ASPTT atletisimu, urganizatore di a manifestazione, un tempu assulanatu, a presenza di i parenti, assai participanti è una ambianza felice. Tuttu u mondu hè statu cuntentu. Un ringraziu maiò à a cumuna chì ci aiuta dapoi diciottu anni… » L’edizione 2023 cù assai zitelli è ghjovani hà chjosu e so porte. Tuttu u mondu s’appronta avà per e feste di a fine d’annata. Aspettendu e prussime corse.
