À l’ora induve u Gazelec si spiazza stu Vennari in Clermont per u contu di a novesima ghjurnata di Lega Duie, u difensore « rossu è turchinu » ci dà u so parè nantu à a situazione di a so squadra è dinò a soia dapoi u principiu di a stagione…
Chì pensate d’issu scontru in Clermont ?
Ghjè, à u me avisu, un scontru novu induve ùn ci vole micca fighjulà daretu. Avemu persu duie volte di fila
, tuttu u modu a sà ma ci tocca à esse cuncentrati solu nantu à stu macciu quì. U gruppu campa abbastanza bè è si vede d’altronde nantu à u terrenu. Avemu principiatu bè l’eserciziu, avà ùn ci vole à pensà nè à Brest nè à Nancy. Avemu persu, fendu qualchì sbagliu ma hè cusì ch’ellu s’ampara. Ùn sò micca dubbitosu, u gruppu t’hà a capacità à reagisce.
Clermont hè quantunque una squadra in forma dapoi qualchì scontru ?
Sicura, è ne semu cunscenti. Una squadra chì t’hà cunfidenza è sempre u penseru di prupone un ghjocu interessante. Pensu ch’avemu, noi dinò a pussibilità di ghjucà bè, n’avemu fattu dighjà a prova fora di casa. Serà, forse, un macciu chjosu cù pochi occasione. Tocca à noi d’esse presenti à e sfide fisiche è di risponde cù e nostre qualità.
Comu vi sentite in stu gruppu ?
À u nivellu mentale, ùn ci hè prublemu ! Sò prontu à dà tuttu nantu à u terrenu. Ma, dopu à una rumpitura di cinque mesi l’annu scorsu, hè statu difficiule di ripiglià. Ùn sò ancu à 100% è mi dispiace monda, masimu ch’e sò statu feritu duie volte quì è ùn aghju fattu preparazione nanzu à a stagione. Ma tuttu hà da vultà à pocu à pocu. Aspettendu, cercu di purtà a me sperienza cù l’altri anziani.
