Una legenda di u pallò mundiale s’hè spenta issu luni in Salzbourg. Franz Beckenbauer, malatu dapoi dighjà qualchì tempu hè sparitu à l’età di settantottu anni. Una pagina di u ghjocu à pallò mundiale si chjode.
Quellu famosu ghjucadore cugnumatu « U Kaiser », l’Imperatore, Franz Beckenbauer s’hè spentu issu luni l’ottu di ghjennaghju in Sazbourg (Austria) induve ellu campava, à l’età di settantottu anni di e seguite d’una longa malatia. Doppiu Palllò d’oru in u 1972 è 1976, triplice vittoriosu di fila cù a so squadra di u Bayern di Munich (1974, 1975, 1976) di a cuppa d’Auropa di i club campioni (antenata di a Lega di i Campioni oghjinca), campione d’Auropa cù a Germania (1972), finaliste in u 1976, vittoriosu di a cuppa di u mondu 1974 in tantu chè capitanu è in u 1990 in tantu chè selezziunatore, Averà scambiatu a manera di ghjucà di i Germani cù u so stilu tuttu fattu di finezza cù un sensu eccezziunale di l’anticipazione.
Un veru capighjucadore
A so manera di cuncepisce u ghjocu, diferente di l’usu rigurosu è assai fisicu di u Bayern è di a Mannschaft hè stata una revoluzione à u so postu di difensore centrale. Un veru capighjucadore. Cunsideratu cum’è u più grande ghjucadore germanu di a storia, entre di sicuru in i deci ghjucadori i più grandi di a storia, pocu impreme l’epica. U Kaiser hà dinò marcatu a storia di a cuppa di u mondu, ghjuchendu più d’un’ora cù un bracciu in sciarpa dopu à una rumpitura di a chjavetta à l’occasione di a meza finale di u 1970 RFA-Italia, i dui rimpiazzamenti eranu stati fatti. Un macciu chjamatu oghje dinò « u macciu di u seculu ». Franz Beckenbauer hè unu di i trè ghjucadori à avè vintu a cuppa di u mondu ghjucadore è selezziunatore cù Mario Zagalo sparitu u 5 di ghjennaghju è Didier Deschamps. Era addestratore di l’OM in u 1990 eppo direttore tecnicu à a finale di Bari. U solu fiascu in a so carriera. Aghjunghje, in paradisu di i ghjucadori di pallò d’altre legende cum’è u so cumpagnu di Cosmos di New-York Pelé, Yohan Cruyff, Diego Maradona, Alfredo di Stefano o Ferenc Puskas. Cun ellu, hè una pagina chì si chjode è tanti ricordi zitellini chì si ne vanu.
