Aiacciu capitale internaziunale di e bucce!

L’associu “Aiacci u Sport Pétanque” urganizeghja, da dumane mercuri sin’à dumenica  a sesta edizione di u so festivale internaziunale di e bucce nantu à a piazza di u Diamante. L’occasione, di vede ciò chì si face di megliu nantu à a pianetta di e bucce. È, à tempu, d’apre cù cuncorsi, più minori, a disciplina à tutti è masimu à i più ghjovani…

A piazza di  u Diamante cuncepita in terreni maiò di bucce, a prisenza di i più famosi ghjucadori di a disciplina-è sò francesi- ma micca solu, u festivale internaziunale di e bucce hè diventatu, da pocu, un evenimente spurtivu impurtante in a Cità Imperiale. Urganizatu da l’associu “Aiacciu Sport Pétanque”, permette di mette in vale ciò chì si face di meglu in a disciplina- Dylan Rocher, Henri Lacroix, Tyson Molinas o Jean-Michel Puccinelli ch`avia vintu a ghjustra l’annu scorsu cù i si cumagni Claudy Webel è Damien Hureau. Ma i respunsevuli di l’associu chì urganizeghja a manifestazione ùn anu micca vulsutu piantà si quì. Fora di i ghjucadori maiò, a cumpetizione si sparghje Cusì ind’una logica di spartera, hè aperta à tutti. Una ghjustra “Open” issu mercuri, un’altra dedicata à e famiglie (trè ghjucadori ma l’obligu d’avè un zitellu natu dopu à u 2005 è una donna). Vennari, trè cumpetizione individuale sò priviste nanzu di entre in a fasa maiò à partesi  da sababtu cù l’Internaziunale di a Cità d’Aiacciu.