A scunfitta di sabbatu di fronte à Montpellier è, d’una manera generale, u percorsu di i rossi è turchini mettenu l’omi di Fred Ferrandez in periculu. Ultimu di a classifica dopu à cinque partite, u GFCA hè in u duru. È paca, ci vole à dilla, e cunsequenze spurtive di a crisa sanitaria…
Un solu puntu, cinque scuffitte di fila, l’ultima piazza di a classifica, ùn s’aspettava micca à un principiu di stagione cusì difficiule per i rossi è turchini. Si sà chè per via di a crisa sanitaria di marzu scorsu, cù cunsequenze finanzarie maiò, u Gaz devia appruntà si à soffre. Ma micca à stu puntu quì. U gruppu 2019-2020 era guasgi statu scambiatu, è quellu di questu annu paria quantunque abbastanza bè. Malgratu a scunfitta di a prima ghjurnata di fronte à Poitiers (2-3), aviamu vistu quantunque un gruppu di qualità in parechji settori di u ghjocu (masimu à u serviziu). Ma s’è daretu, i punti persi in Chaumont è Tourcoing (3-1 e duie volte) parianu logichi, u macciu di fronte à Cambrai, chì cullava di Lega 2 (0-3) hà mustratu a debulezza d’un gruppu chì perde, à pocu à pocu, cunfidenza. Fû li stessu per quellu di Montpellier, ancu s’è issa squadra quì hè d’una altru nivellu. À l’arrivu, u GFCA hè solu ultimu di a classifica è s’aspetta à un eserciziu abbastanza duru. Sperendu, s’è u Covid ùn vene micca mettesi à mezu, una reazzione issu 30 d’ottobre in Tulusa.