Olivier Miniconi dà a so demissione

0

Dopu à quattordeci anni à u serviziu di u Gazelec, Olivier Miniconi, presidente di u GFCA, hà datu, stu luni, a cunferma di a so partanza da a squadra « rossa è turchina ». Aspettendu, l’arrivu d’un altru presidente, ghjè Christophe Ettori, attuale direttore spurtivu, chì ferà a leia. Olivier Miniconi starà, per avà, u solu presidente du u Gazelec à avè fattu cullà u club in Lega una…

A nutizia, tuttu u mondu a cunniscia più o menu in i quartieri aiaccini. È què, forse dapoi qualchì tempu. Hè diventata ufficiale stu luni in fine di matinata. Olivier Miniconi a annunciatu ch’ellu avia datu a so demissione à u Cunsigliu d’Ammnistrazione du i GFCA. Una decisione mutivata da e difficultà à gestisce u so rolu à tempu à quellu di capu d’impresa. Ghjuntu in u 2004, Olivier Miniconi hà cunnisciutu, forse, una di l’epiche e più maiò di u GFCA cù una meza finale di cuppa du Francia (2012), ciò ch’ùn era mai accadutu nanzu, duie cullate in Lega duie è, di sicuru, una stagione in Lega una (2015-2016). Adilà di l’aspettu solu spurtivu, hà permessu, cù a squadra dirigente, di travaglià intornu à e strutture di u club (terrenu, tribuna, squadre riserva, ghjovani). Divia fà st’annuncia di ghjugnu scorsu ma ùn hà pussutu per colpu di a falata di a squadra in Naziunale è di prublemi amministrativi. Aspettendu l’arrivu d’un altru presidente, ghjè Christophe Ettori, direttore spurtivu di u GFCA chì hà da fà a leia. Cù a partanza d’Olivier Miniconi, omu chì gestitu abbastanza bè u Gaz, ghjè una pagina di a storia rossa è turchina chì si chjode. Un’altra s’hà da apre. Cù, sperendu, u listessu successu…

Sparte

Dipusità unu cummentariu