Lisandru Tramoni à a ghjustra mundiale di Montaigu

L’attaccante menu di sedeci anni di l’ACA hè statu sceltu da  José Alcocer, addestradore di a squadra di Francia per participà da u sedeci à u vintidui d’aprile à a famosa ghjustra internaziunale di Montaigu induve parechji ghjucadori, oghje, monda cunniscitu, sò passati. Una bona per un ghjuvanotta chì face, à pocu à pocu a so strada…

L’ultima volta ch’avemu vistu à Lisandru Tramoni in a squadra di Francia era…di ferraghju in Ingliterra. U ghjovani attaccante (menu di sedeci anni) s’era fattu rimarcà cù trè realisazione è una passa decisiva participendu, cusì, à u percorsu di a so squadra. Era logicu, di vedelu chjamata, torna una volta à l’occasione di a ghjustra di Montaigu. Una ghjustra internaziunale, mundiale ancu, induve parechji ghjucadori prumessi à a una bella carriera sò passati. Cusì, è à mezu à ghjucadori di Lega Una (Monaco, PSG, Saint-Etienne, Rennes, Amiens, Caen…) o Lega duie (Nancy, Le Havre, Sochaux, Metz, Lens…), hà da participà à una ghjustra d’un altru nivellu. L’occasione forse, è torna una volta, di fà rimarcà. In u gruppu A d’una cumpetizione induve ritruvemu tutte e squadre maiò di u ghjocu à ballò mundiale, a Francia ghjucherà contru à Spagna (u sedeci à settte ore di sera), u Messicu (u diciottu) è u Brasiliu (u vintidui). Bona furtuna à u « biancu è rossu ».