L’ACA ripiglia fiatu!

0

A vittoria di sabbatu scorsu in Clermont permette, aldilà di i trè punti, di ripiglià cunfidenza. Un successu da cunfermà sabbatu chì veni di fronte sta volta, à Troyes, secondu di a classifica.

Ci sò vittorie, in u ghjocu à pallò, chì valenu più chè trè punti. Quella di l’ACA in Clermont sabbatu scorsu ne face parte. È senza sapè ciò chì hà da accade dopu, si pò pensà chè i bianchi è rossi anu principiatu, in fine, u so campiunati. Parechji elementi danu a cunferma d’iss’ analisi. Prima u statutu di l’avversariu, ch’ùn avia mai persu in casa soia. Dopu i statistichi (l’ACA ùn avia mai vintu quallà), è di sicuru, una voglia ritruvata chì face prò. S’è no aghjustemu u dispusitivu in 4-2-3-1 cù Baretto forse più interessante à mezu chè nantu à un fiancu, a partita di Sainati, chì hà purtatu monda daretu, u travagliu di Marchetti in mezu terrenu, è appena di furtuna (ci ne vole), issa partita pudaria sulcà u soffiu novu di l’ACA. Hè vera chè u ghjocu à pallò ùn hè una scenza ghjusta ma quantunque, ci si pare à noi chè u macciu di sabbatu fù nantu à u li stessu versu chè l’annu scorsu. Aspettemu, avà, a cunferma, sabbatu chì vene di fronte à Troyes, secondu di a classifica. Torna un cilente !

Sparte

Dipusità unu cummentariu