L’ACA è u Gazelec si ritrovanu issu venneri in Timizolu per a settesima partita à issu nivellu. per avà, u bilanciu hè favurevule à l’ACA (quattru vittorie, trè di fila). Una partita chì face parlà l’Aiaccini dapoi tanti è tanti ghjorni. Cum’è tempi fà. Nantu à u terrenu dinò, i ghjucadori aspettanu issu mumentu. Frà elli, un attore « particulare », GB Pierazzi, chì vulterà per a prima volta dapoi cinque anni in Timizolu. Ma ind’è l’altru cantu. Ci dà u so parè à qualchì ora di u macciu.
-U to ritornu in Timizolu hè un mumentu particulare in a to carriera?
Sicura:! À dilla franca, ùn m’aspettavu micca à vultà in isse cundizione quì. L’ACA face parte di a me vita, ci aghju passatu tredeci anni. Ma hè dinò a vita d’un ghjucadore di ballò. Aghju quì assai ricordi è amichi ma portu, oghje, i culori di u GFCA, hè sempre una squadra aiaccina. Vogliu rende, à i dirigenti, tutta a cunfidenza ch’elli m’anu purtata. Ci serà forse, un’emuzione nanzu è dopu u macciu. Ma nentru, aghju da fà tuttu per vince.
-U GFCA hè in periculu oghje. Chì hè u to parè nantu à issa situazione quì ?
Ùn hè cusì faciule. Aviamu fattu un bellu principiu di campiunatu cù una bella cinquesima piazza à a fine d’aostu. Dapoi cinque partite, semu in difficultà. Ma ùn pensu micca ch’avemu pussutu perde u nostru ghjocu d’un colpu. Ci hè una pressione è u dubbitu. Manca pocu. Ci vole à ripiglià cunfidenza,, issu macciu quì hè forse quellu chì ci pò permette di riparte in u campiunatu.
-Ùn ai micca ghjucatu dapoi un mese. Comu ti sente ?
Aghju da esse appena cortu, forse, à u nivellu fisicu. Ùn la sò s’aghju da pudè tene sin’à a fine, ch’ùn aghju micca avutu cumpetizione dapoi a me cartulina rossa in Clermont. Ma aghju da fà tuttu per permette à a squadra d’ottene un resultatu.
Ci seranu parechji corsi ch’ella sia à l’ACA o u Gazelec. Un perfumu particulare ?
Iè masimu ch’aghju ghjucatu cù Yohan Cavalli è François-Joseph Sollacaro. Hè sempre particulare di ghjucà per a squadra d’une cità induve sete natu. Ma, à tempu, sò fieru di vede tutti sti ghjovani : Matteo Tramoni o Lucas Pellegrini, à l’ACA, Thibaut Campanini, Julien Anziani o Dumè Guidi à u GFCA. D’altri ghjunghjenu. Pensu ch’elli custituiscenu l’avvene di u ghjocu à ballò aiaccinu è corsu. Pudemu esse fieri d’accumpagnà li…
ACA-GFCA si pò parlà d’un veru « derby » ?
Pensu ch’aldilà di e rivalità trà e duie squadre, l’Aiaccini ùn anu micca cuscenza di ciò chì pò riprisentà un macciu cum’è quessu. Una cità di 70000 abitanti chì t’hà duie squadre prufessiunale. Hè qualcosa di strasordinariu…
