Senza esse tremende, i Bastiacci, realisti à mumenti maiò di a partita, anu vintu di fronte à u Gallia, sabbatu scorsu in Furiani (4-0). Una vittoria chì li permette di mantene u ritimu in capu di a classifica.
Quand’è vo vincite quattru à zeru, di regula, ci saria pocu à dì per ciò chì tocca à a fisiunumia di a partita. Ma, s’è no fighjulemu bè issu macciu trà vicini bastiacci (U Sporting è u Gallia Lucciana), masimu quelli chì eranu in Furiani sabbatu scorsu, vidimu subbitu chè l’affare fù abbastanza duru per l’omi di Stefanu Rossi. Di fattu, ghjè a prima realisazione, dopu à diciottu minute (stucciu da l’esternu di u pede dirittu di Kévin Schur) chì hà datu u filu di partita. I Bastiacci sò intruti bè in issa partita ma ci pudemu dumandà s’è a prima realisazione ùn l’hà appena addurmintati. Chè, à pocu à pocu, ghjè u Gallia chì hà pigliatu a suprana, cù un’occasione tamanta da Giannone (34a). Tandu, u Sporting, pocu abituati à esse scuzzulatu cusì in casa soia, pudia esse cuntente à fine di u primu tempu.
Un scenariu pocu scambiatu à a ripresa. È ci hè vulsutu à aspettà l’ora di ghjocu per vede i Turchini ripiglià fiatu. Mentre chè u Gallia mantenia a so pressione, un contru è un stucciu di Vincent sò ghjunti à u succorsu di a squadra bastiaccia. Tandu, u macciu era compiu. L’avversariu hè calatu è u Sporting n’hà prufittatu per marcà duie altre volte da Santelli è Schur. 4-0, una marca abbastanza dura per l’omi di Corlija ma i Bastiacci anu avutu, elli, u realisimu chì l’hè mancatu…
