Suspesu cinque mesi (dui attempati) dopu à un « imbrogliu » cù un ghjurnalistu lucale, l’addestradore di Laval hà ripigliatu a so piazza di manera ufficiale a settimana scorsa . Frà tempu, a so squadra s’hè stallata à u capu di a classifica di a Naziunale una…
Hè un pezzu ch’ùn aviamu più vistu à Francescu Ciccolini. Assai discretu dopu à a so suspensione d’aostu scorsu –un imbrogliu cù Martin Cotta, ghjurnalistu di France Bleu Mayenne-, si vedia pocu. Ciò ch’ùn l’impedia micca di travaglià tutta a settimana cù a so squadra, di gestisce tutte e seenze, d’esse prisente in i spugliatoghji nanzu è dopu à i macci, di gestisce dinò i scambiamenti ancu s’è u so aghjuntu, Pascal Braud era nantu à u bancu à ogni partita. È, di fattu, u Cuzzanacciu hà ripigliatu u so postu u quindeci di nuvembre scorsu. Trè mesi, un tempu induve a squadra di Laval, ch’avia principiatu a staghjone pian’pianinu, s’hè stallata à u capu di a classifica di a Naziunale una. Un percorsu chì traduce, ancu s’ellu ùn hè micca ufficiale, l’impegnu di l’addestadore, in tutti i casi a so manu (ottu vittorie, una parità, duie scunfitte) nanzu à un macciu monda aspettatu issu vennari di fronte à Pau…
