Associ in festa in Aiacciu: una riesciuta maiò!

Più di 10000 parsone anu participatu, issa dumenicata, in Aiacciu, à l’edizione 2018 di a festa di i sporti. Una manifestazione chì adunisce, dapoi 4 anni, l’associ spurtivi,  culturali o umanitarii è si chjama « Associ in festa »…

A festa di i sporti in Aiacciu  hè l’appuntamentu maiò dapoi anni è anni per i ghjovani chì ponu scopre è ancu pruvà una disciplina. Hè l’occasione, à tempu, per l’associ diversi, di fà a prumuzione di u so travagliu. E per tutti, un mumentu di spartera è di piacè. Dapoi quattru anni, a manifestazione hè aperta à l’associ culturali, suciali, o umanitarii. Si chjamà tandu « Associ in festa ». Issa dumenicata, l’edizione 2018 hè stata un successu maiò  , masimu c’un tempu abbastanza assulanatu. Discipline cunnisciute o micca, attività culturale, prevenzione, suciale, nulla ùn hà mancatu per zitelli è ghjovani. Durante dui ghjorni eranu 10000 accumpagnati o micca da i so parenti à ghjunghje  nantu à  a piazza di u Diamante. « Semu felici, spiega Marcu Leca, respunsevule di i sporti à a municipalità, ci sò pruposte diverse per tutti, hè l’occasione, per i zitelli di sceglie  un’attività, è à tempu d’avè un sguardu nantu à a prevenzione è ciò chì  tocca à u suciale è l’umanitariu… » A manifestazione hà chjosu e so porte. S’appronta dighjà l’edizione 2019…